”Tədrisin uğur amilləri” adlı monoqrafiyamdan bir parça.
Səadət Kərimi
2005 ci ildən etibarən Azərbaycan Respublikasında yeni məktəb qanunu layihəsi, yeni təhsil konsepsiyası, hazırlanmağa başlandı və 2009 cü ildə Milli Kurrikulum adlanan bu konsepsiya qanuna mindi. Lakin bu konsepsiyanın həyata keçməsi, onun müəllimlərin fəaliyyətində tətbiq olunması düşünüldüyündən çox zaman almış oldu. Azərbaycanda müəllimlərin çoxunluğu kurrikulum üsulu ilə dərs keçmək və dəyərləndirmə aparmaqda çətinlik çəkdiklərini bildirirlər. Çoxlu sayda müəllimlərin müraciətlərini nəzərə alaraq İsveçdə qazandığım bilik və təcrübələrimlə paylaşmaq qərarına gəldim, yəni bu əsər ilə ambisiyam və ümidim kurrikulum və dəyərləndirmə məsələlərinə aydınlıq gətirməkdir. Təqdim etdiyim əsərin birinci hissəsində keyfiyyətli tədris və səmərəli öyrətmən haqqında müzakirə aparacağam, ikinci hissəsində isə dəyərləndirmə haqqında bilgilər verəcəyəm. Əsərdə ibtidayi təhsil, ümumi orta təhsil, tam orta təhsil, həm də ali təhsil və peşə-ixtisas məktəbləri müəllimləri/lektorları/ usta və s. üçün ortaq termin kimi öyrətmən sözündən, təhsil alanlar üçün isə öyrənci (şagird, tələbə) sözündən istifadə edirəm.
Birinci hissə
Yeni Təhsil Qanunu əvvəlkindən fərqli olaraq qiymətləndirmə, nəzarət və idarə etmə üçün fərqli əsas verir. Təhsilin elmi əsaslara söykənməsi və sınaqdan keçmiş təcrübələrə dayanması yeni konsepsiyada özəl vurğulanır.
Müasir cəmiyyətdə məktəb yeni rol alır. Təhsil vasitəsilə fərdin həyatı və cəmiyyət dəyişə bilir. Bütün dünyada aparılan okul islahatları getdikcə elmi araşdırmalar və yoxlamalar üzərində qurulur. Öyrətmənlərin hazırlanmasına, öyrətmənlik təhsilinə elmi əsas vermək üçün, yəni pedaqogika və psixologiya elmlərinə əsaslanaraq, ilk professorluq məqamı 20-ci əsrin əvvəllərində yaradılmışdı. O zamandan bəri qərb ölkələrində tədris proqramları elmi tədqiqatın gedişatına uyğun formalaşmışdır. Bir əsrdən çox müddət ərzində elmi əsaslara və təcrübəyə söykənən təhsilə doğru inkişaf yolunda görülən işlər, hər ölkənin Təhsil Qanununda yazılmışdır.
Tədrisin necə baş verdiyi və hansı nəticələrin verdiyini təsvir etmək və təhlil etmək asan deyil. Tədris (dərs, seminar, mülahizə, laborativ məşğələ, workshop və s.) və öyrənmə kompleks fəaliyyətlərdir, onlar daima öyrənilən materialın məzmunundan asılı olan, öyrənildiyi kontekstin və mövcud zamanın və s. faktorların təsirində olan fəaliyyətlərdir.
İlk öncə qeyd etməliyik ki, Təhsil Nazirliyi nəzdində, bütün tədris ocaqlarında hər bir öyrənci diqqət mərkəzində olmalıdır, bütün uşaqlar və yetişkinlər etibarlı mühitdə yaxşı təhsil ala bilməlidirlər və hər bir şəxsin biliyini inkişaf etdirmək hüququ bərabər şəkildə sağlanmalıdır. Okul Müfəttişliyi davamlı olaraq tədris ocaqlarının fəaliyyətlərini yoxlamalı və hesabatlar verməlidir. Öyrəncilər (şagirdlər/tələbələr) bu gün okulda bir şey öyrənirlərmi ? Öyrənirlərsə, nə öyrənirlər? Öyrətmənlər hansı üsullardan, metodlardan istifadə edirlər? Bu suallar cəmiyyətdə daim müzakirə olunub, elmi araşdırmaların mövzusu olubdur. Alman alimi Karl Jaspers (1883-1969) demişdir ki, “Bilik metod vasitəsilə elmə çevrilir, məlum olan ünsürlərdə sistematik birlik qurulur; elmi tədqiqat isə çoxlu fərqli cəhətlərin ötəsində birləşdirici prinsipləri görür.”
Elmi əsaslarla dərs demək hünəri. Öyrəncilərin nəyi öyrənməsi, necə öyrənməsi, həmçinin öyrəndiyi dərsin günümüzdə, yəni intensiv biliklər tələb edən qlobal cəmiyyətin işığında, düzgün şey olub-olmaması ilə bağlı suallar, bir çoxlarının düşündüyü mövzulardır. Bu məsələlər dünyanın əksər ölkələrində siyasi gündəmdə önəmli yer tutur. Sosial-iqtisadi mənşəyindən asılı olmayaraq, bütün uşaqların gələcək üçün bilik, bacarıq, qabiliyyət və (mənəvi) dəyərlərinin davamlı bir təmələ sahib olması məqsədilə okulda tədrisin təkmilləşdirilməsi və öyrənmənin yaxşılaşdırılması dövrümüzün ən böyük məsələlərdən biridir. Bir öyrənci ömrünün təxminən 20 min saatdan çox vaxtını (məcburi dərs saatını) okulda keçirir. Öyrətmənin borcu bu vaxtın səmərəli və keyfiyətli keçməsini təmin etməkdir. Lakin tədrisdə keyfiyyət nədir? Buna kim qərar verir? Bu keyfiyyəti necə dəyərləndirmək olar? Bu sualların da cavabı zamanın tələbidir və başqa ölkələrdə olduğu kimi Azərbaycan Respublikasında da kurrikulum sistemi ilə tədris zamanın diqtəsindən, bazar iqtisadiyyatına keçid səbəbindən və başqa ölkələrlə inteqrasiya zəruriyyətindən irəli gəlmişdir.
Kurrikulum üzrə tədris elmi əsaslarla inkişafa töhfə vermək üçün nəzərdə tutulmuşdur. Kurrikulum üzrə qurulan tədrisdə öyrətmən bütün biliklərini və peşəkarlığını səfərbər etməlidir. Bu sistemdə öyrəncinin fəal olmalısı nəzərdə tutulur.
Öyrətmənlik sənət olmalı yoxsa elmin nəticələrinə əsaslanmalıdır? İkisindən birini seçmək məcburiyətindəyikmi? Bu sual həm tədqiqatçılar, həm də bu sahədə təcrübə edənlər arasında həqiqətən böyük və klassik mübahisələrdən biridir. Onun ilk aparıcı tədqiqatçılarından biri, amerikalı alim Natanel Geyc (Nathanael Gage (1917-2008)) 1970-ci illərdə öz fikrini ”tədris elmi əsası olan bir sənət formasıdır” deyə ifadə etmişdir. Tədris icrasına görə yaradıcı fəaliyyətdir, amma əsaslandığı prinsiplərə görə elmi fəaliyyətdir. Yəni, öyrətmənlik həm sənətdir, həm də elmi araşdırmaların nəticələri üzərinə aparılan fəaliyyətdir. Elmi araşdırmalarla sadəcə tanış olmaq yetərli deyil – hər bir öyrətmən araşdırmaların nəticələrini öz fəaliyyətində, öz gündəlik praktikasında tətbiq etməlidir. Öyrətmən, digər yaradıcı peşələrin mütəxəssisləri kimi, mövcud vəziyyətə və/və ya hadisələrin inkişafına uyğun olaraq davamlı öz fəaliyyətini dəyərləndirir. Tədrisin ardıcıllığında hər şeyi qabaqcadan rasional planlaşdırmaq mümkün deyil. Belə bir sırf mexaniki tədris nə kiməsə maraqlı olar, nə də səmərəli olar. Riyaziyyat və ya kimya, fizika, digər təbiət elmlərində universal qanunların formalışdırıldığından fərqli olaraq, Geycin də dediyi kimi, məlum faktdır ki, tədris və öyrənmə haqqında biliklər universal qanunlarla ifadə oluna bilməz. Bu qanunlar təbiət elmlərində bir-birinə əlavə olunaraq aşkar bir dəlilə (ing. evidence) gətirib çıxarır. Tədris haqqında isə fərdi, mükəmməl tədqiqat işləri sayəsində qəti, kəsin və etibarlı bilik əldə etmək mümkün deyil. Bu bilikləri yalnız müxtəlif mənbələrdən almaq olar (Gage, 1978, s. 34). Evidens sözü əslində elmi dəlil deməkdir. Latın dilində evidens sözünün mənası bir ifadənin açıq-aydın olması ilə əlaqələndirilir. Daha geniş mənada isə, evidens ənənələrə, hazır ideologiyalara və ya şəxsi fikirlərə güvənməkdənsə, bir suala dair ən etibarlı bilikləri və hesabatları axtarmaq deməkdir. Bu əsər evidenslərə əsaslanan icmalların və ya çoxlu sayda sistematik araşdırmaların, tənqidi təhlili olan araşdırmaların sintezi kimi ərsiyə gəlmişdir.
Elmi əsaslarla tədris. Həm elm, həm sınaqdan keçmiş təcrübə. Çoxları üçün tədris və elm haqqında eyni mənada danışmaq ziddiyyətli görünə bilər. Tədris və öyrənmə haqqında biliklər ənənəvi olaraq praktiki məsələlər sayılmışdır. Pedaqoji kontekstdə öyrətmənlər tez-tez Dərsə hansı məzmunu seçməliyəm? Yaxşı tədris mühiti və öyrənmə situasiyasını necə yarada bilərəm? Hansı dəyərləndirmə növü daha yaxşı olardı? Nəticəni necə dəyərləndirə bilərəm və bu kimi başqa sualları özlərinə verirlər. Bu suallar nəzəri cavabları olmayan, praktika tələb edən suallardır. Məhz sualların praktiki təbiəti, üstəlik onların həyatda çox sayda insana aid olması, ona səbəb olur ki, tədrisin və öyrənmənin necə baş verdiyi barədə gündəlik yaşamda çoxlu müxtəlif təsəvvürlər mövcuddur, məsələn dərs necə olmalıdır və ya necə olmamalıdır. Bu cür anlayışlar çox vaxt ümumiləşdirilir. Çoxları güman edir ki, bir tədris kontekstində yaxşı yarayan metod başqa vaxt da və ya başqa tədris kontekstində də tətbiq oluna bilər. Şəxsi təcrübələr və ya fikirlər asanlıqla genəl qanun kimi təqdim olunur. Lakin hər bir fikrə və ya üsüla tənqidi yanaşmaq gərəkir.
Didaktika, yəni tədris və öyrənmə, həm praktiki, həm də nəzəri tədqiqat və bilik sahəsidir. İlk öncə qeyd edək ki, tədris və öyrənmə sahəsində biliklərin inkişafı təcrübəyə və nəzəri cəhətdən əsaslanan biliklər arasında gedən interaktiv, qarşılıqlı və uzunvadəli dialoq vasitəsilə baş verir, yəni öyrətmənlər və tədqiqatçılar arasında gedən dialoq vasitəsilə. Tədris və öyrənmə haqqında bilik axtarmağa başlayan biri anlaşılması çətin olan çoxlu sayda müxtəlif ədəbiyyata rast gəlir. İlk baxışdan adama elə gəlir ki, hər bir ölkənin özünəməxsus terminologiyası, baxış açısı və metodları var – bunların hamısı milli və mədəni xarakter daşıyır. Lakin hal-hazırda beynəlxalq terminlər bərqərar olmaqdadır və bu məqsədəuyğundur, özəlliklə dövrümüzdə beynəlxalq bilik mübadiləsinin artması baxımından. Məsələn beynəlxalq aləmdə PISA və TIMSS kimi bilik tədqiqatları aparılır. PISA (Programme for International Student Assessment, Beynəlxalq Tələbə Qiymətləndirmə Proqramı) İqtisadi Əməkdaşlıq və İnkişaf Təşkilatının (OECD) layihəsidir, hər üç ildən bir keçirilir. PİSA araşdırmalarında dünyanın 57 ölkəsi iştirak edir. Məcburi orta təhsil məktəbini bitirmək üzərə olan on beş yaşlı öyrəncilər riyaziyyat, təbiət elmləri və oxuduğu mətni anlama testlərində iştirak edirlər. Onların cavablarını öyrənməklə hər bir ölkənin təhsil sisteminin öz vətəndaşlarını gələcəyə hazırlamaqda verdiyi töhfəsi dəyərləndirilir. Eləcə də TİMSS (Trends in International Mathematics and Science Study, Beynəlxalq Riyaziyyat və Təbiət Elmlərinin Öyrənilməsində Meyllər) testlərində 4 -cü və 8-ci sinif öyrənciləri iştirak edirlər. TİMSS, The International Association for the Evaluation of Educational Achievement (IEA), yəni Beynəlxalq Təhsil Nailiyyətinin Qiymətləndirilməsi Assosiaysı tərəfindən təşkil olunur və hər dörd ildən bir keçirilir. PİSA və TİMSS beynalxalq səviyyədə iki ən böyük araşdırmalardır.
Tarixən beynəlxalq səviyyədə anqlo-sakson ölkələri, Avropa qitəsi (kontinental)/şimal ölkələrinin tədris sistemlərində fərqli yanaşma mövcud olmuşdur. Anqlo-sakson ölkələr, yəni ingilis dilli ölkələr, curriculum and instruction system, yəni tədris proqramı və təlimat sistemini tətbiq etmişlərdir. Kontinental ölkələr/quzey (alman dilli) ölkələri isə didaktikaya üstünlük vermişlərdir. Son dövrdə tarixən mövcud olan bu fərqli yanaşmalar aradan qaldırılmaq üzərədir. Bu gün, məsələn, fərqli milli ənənələr arasında davamlı və sistematik şəkildə dialoqu inkişaf etdirən Avropa və anglo-sakson nümayəndələri, eyni zamanda tədris planı araşdırması, fənn didaktikası, öyrətmənlər və öyrənmə araşdırmaları kimi ayrı-ayrı sahələrin tədqiqatçıları arasında beynəlxalq tədqiqat əməkdaşlığının nümunələri mövcuddur. Didactics – Learning and Teaching adlanan şəbəkə (Didaktika – Öyrənmə və Tədris) 2007-ci ildə təhsil tədqiqatçılarının EERA (Avropa Təhsil Assosiasiyası) təşkilatı tərəfindən müxtəlif təhsil ənənələri və tədqiqat sahələri arasında uzunmüddətli dialoq qurmaq üçün yaradılmışdır.
Kontinental və anqlo-sakson ənənələrinin arasında həm də onların öz içərisində çoxlu sayda müxtəlif didaktik nəzəriyyələr və metodlar var. Əsas fərqləndirici xətlər isə milli/kültürəl və dil ənənələri ilə bağlıdır. Qitə ənənəsində tədris və öyrənmə ilə bağlı bilik və tədqiqatlar didaktika termini ilə gedir. Bu termin anqlo-sakson təhsil kurslarında adətən işlədilmir, çünki onlarda didaktika deməklə konkret tədris ünsiyyətində praktiki və metodoloji problemlərə istina edilir. Yəni anqlo-sakson ənənəsində didaktika termini ilə Almaniya, İsveç və başqa almandilli ölkələrdə olduğu kimi müstəqil bir tədqiqat sahəsi nəzərdə tutulmur. Ancaq didaktika sözünün uzun, kontinental tarixi var. Sözün kökü yunan dilindən, didaskein sözündən gəlir, öyrətmək, dərs demək, təhlil etmək, sübut etmək deməkdir. Beləliklə, terminin mənası sözün orijinal formasında təkçə dərs demək və öyrətməyə şamil olunmur. Pedaqoji kontekstdə didaktika termini əsasən 1657-ci ildə çex pedaqoqu Komenius – Yohann Amos Comenius (1592-1670) – tərəfindən onun Didactica Magna (”Təhsilin Böyük Doktrinası”) əsəri ilə meydana gəlir. Məhz Komenius ilə didaktika ayrıca və özünəməxsus pedaqoji sahə kimi formalaşmağa başlayır. Komeniusun nəzəriyyə quruculuğu tədris etmək və öyrənmənin təşviqi üçün ümumi metod hazırlamaq məqsədi daşıyırdı. Didaktika burada praktiki və normativ doktrina kimi, yəni öyrətmə sənəti kimi, tərif olunur.
Alman filosofu və pedaqoqu Johan Fridrix Herbartla – Johann Friedrich Herbart (1776-1841)- didaktika təhsil sahəsində mərkəzi yer tutmağa başladı. Herbartın didaktika elmini sistematik olaraq inkişaf etdirməsi ilə, bu sahə elm kimi qəbul olundu. Herbart öyrətmən, məzmun və öyrənci arasındakı qarşılıqlı əlaqəni vurğulayırdı. Herbartın davamçıları isə onun sistematikliyini beş pilləli model ilə ifadə etdilər: hazırlıq, təqdimat, assosiasiya, ümumiləşdirmə və tətbiq.
Avropa okullarının çoxu tarixən kontinental didaktika ənənəsi ilə inkişaf etmişdir, məsələn nəzəri, empirik-analitik və tənqidi-kommunikativ didaktika ilə. Eyni zamanda, kontinental ənənə həmişə fəlsəfi və nəzəriyyəyönlü olmağa davam etmişdir və konseptual modellər üzərində qurulmuşdur. Bütövlükdə kontinental okullar, hələ də Avropada, əsasən də Quzey Avropada, təhsil və okul sisteminin təməlini təşkil edir.
Kurrikulum. İngilis dilli ölkələrdə işlənən curriculum termininin də uzun tarixi keçmişi var, bu tarix 16-cı əsrin sonlarında Şotlandiya və Qlazqov Universitetində (Glasgow) başlayır. Ehtimal ki, kurrikulum protestantizm və xüsusilə İsveçrəli islahatçı Jan Kalvinin adını daşıyan – Jean Calvin (1509-1564) – kalvinizm ilə gələn bir anlayış idi. Bu zaman, kurrikulum termini çoxillik tədris planı konsepsiyasında, geniş mənada, işlənirdi. Bu tədris planı Qlazqov Universitetində oxuyan öyrəncilər üçün tərtib olunurdu. 18-ci əsrdə kurrikulum termini almandilli ölkələrdə yoxa çıxdı, işlənmədi, və sonradan, xüsusən də 20-ci əsrin sonlarında anqlo-sakson təhsil mətnlərində yenidən işlənməyə başladı. Anqlo-saxon ideyalar ənənəsində araşdırmaların tarixi kontinental araşdırmalarından böyük deyil. Onların tədris və öyrənmə mövzusunda araşdırmaların tarixi praqmatizmlə başlayır və XIX əsrin sonlarına təsadüf edir. Filosof, psixoloq və pedaqoq Con Devey – John Dewey (1859-1952) – və filosof, psixoloq və həkim Uilyam Ceims – Williams James (1842-1910) – bu sahənin iki ən əhəmiyyətli nümayəndəsi sayılırlar.
Eyni zamanda, psixoloq Edvard Torndaykın – Edward L. Thorndike (1874-1949) – inkişaf psixologiyası elmdə güclü yer tutmağa başladı və nəzəri tədris və öyrənmə araşdırmalarında mərkəzi yer aldı. Beləliklə, 20-ci əsrin Amerikasında tədris haqqında debatlarda Torndayk Devey üzərində üstünlük qazandı. Diqqət mərkəzində praktiki və empirik olan davranış nəzəriyyəsi (behaviorism) oldu. Araşdırmaçılar öyrəncinin uğurlu olmasına səbəb olan səmərəli və rasional amilləri axtarmağa çalışırdı. ”Öyrənməkdə bacarıqlı olmaq” (”Mastery learning”) konsepti behaviorizmin ilk tədbiqlərindən idi. Konsept təhsil psixoloqu Bencamin Blumun (Benjamin Bloom, 1913-1999) taksonomik modellərinə əsaslanaraq öyrənmə prosesində müşahidə olunan addımları təsvir edirdi (”higher order thinking skills”).
ABŞ -da zamanla iki ayrı-ayrı sahələr bərqərar olundu: kurrikulum və təlimat sahəsi (curriculum and instruction) və təhsil psixologiyası sahəsi (educational psychology). Quzey Avropada, özəlliklə Skandinaviya ölkələrində, tədrisdə 19-cu əsrin sonundan bəri alman didaktikasına üstünlük verilmişdir və öyrətmənlik peşəsinin kültürəl və xeyriyyəçi əsaslarda dayandığı vurğulanmışdır. Lakin son onilliklərdə, Skandinaviya ölkələrində mahiyyət və qiymət yönümlü didaktikadan (həm sözdə, həm tədris proqramlarında) formal və instrumental didaktikaya keçiblər. Yəni Quzey Avropa okulları indi daha çox anqlo-sakson yöntəmli olubdur. Tarixən İsveçdə tədris və öyrənmə ilə bağlı araşdırmalar kontinental ənənəsinə bağlı olmuşdur, amma son onilliklərdə xeyli dəyişiklik gedibdir. İsveç didaktika tədqiqatçısı Ulf P. Lundqren (1942-) bu sahənin tədqiqat şərtləri üzrə mütəşəkkil qurulmasına ehtiyac duyulduğunu qeyd etmişdir. Lundqrenə görə, yeni biliklər nəzərə alınmalıdır, köhnələrin üzərində qurulmalıdr və tədqiqatçılar arasında səmərəli ünsiyyət mövcud olmalı və inkişaf etməlidir. Əks təqdirdə, didaktik tədqiqat sahəsinin elmdən qaynaqlanmaq əvəzinə, siyasət və iqtisadiyyatdan doğan maraqlara bölünməsi riski var. Lundqrenin dediyi kimi, risk ”didaktika sözünün konsepsiya üzərində hakimlik etməsindədir”. Buna görə də Lundqren hələ 1992-ci ildə ”Didaktikanın adı” adlı məqaləsində tədris və öyrənmə ilə bağlı məlumatlandırma işini irəli sürmüşdü, yəni tədris və öyrənmə barədə necə danışmalı, hansı qaydalarla, işlənilən terminlərin kimin və hansı əsaslarla müəyyənləşdirdiyini müzakirəyə çıxarmışdı.
“Biz” tədris üçün nəyi seçməliyik? Niyə ”biz” məhz bunu seçməliyik? Buna qərar vermək üçün “biz” kimik? “Bizim” qərar verdiyimiz tədris necə olmalıdı? Didaktikanın bu və ya digər suallarının zamansız olduğunu söyləmək olar. Onlar həm kontinental, həm də anqlo-sakson və Quzey Avropa ənənələrində tədris və öyrənmə hədəflərini təsvir edirlər. Niyə?-sualları tədris planındakı məzmundan, yəni Nə?-suallarından irəli gəlir. Sonra Necə? sualı irəli gəlir, yəni təşkil formaları və məqsədlərə çatmaq üçün tədris qaydaları, tədris və öyrənmə vəsaitləri və tədris mediası (vasitələr və media). Didaktikada həmçinin təlim nəticələrinin nəzarət və qiymətləndirilməsinin yolları barədə suallar, nəticə sualları irəli sürülür.
Beləliklə, didaktika geniş mənada tədris və öyrənmə üçün genəl sosial nəzəri çərçivə anlamında işlənir və tədris planı nəzəriyyəsi ilə kəsişir. Bununla birlikdə, didaktika anlayışı həm də inkişaf və öyrənmə psixologiyası nəzəriyyəsinin tətbiqinə dayana bilər.
Tədris situasiyasında mərkəzi elementlər. Bu əsərdə mövzunu didaktik üçbucaq əsasında müzakirə etməyi seçmişəm (bax, Şəkil 1.1). Diqqət mərkəzində institutlaşmış okul fəaliyyətində tədris və təlim prosesləri durur, yəni sinif konteksti. Seçim, təşkil və qiymətləndirmənin geniş sosial, tarixi və/və ya siyasi aspektlərini müzakirə etmədən, diqqəti didaktik üçbucağın hüdudları çərçivəsinə yönəldək.
Didaktik üçbucaq adlanan nəziriyyənin çox uzun bir tarixi var və bu termin tədris və öyrənmə mövzusunda araşdırmaların təməl anlayışıdır. Bu nəzəriyyə hər bir tədrisdə mövcüd olan mərkəzi eləmentləri, yəni öyrətmən, öyrənci və tədrisin məzmununu, bir araya gətirir və onları bir-biri ilə əlaqələndirir. Didaktik üçbucağın bir neçə fərqli variantları var. Mənim seçdiyim üçbucaqda yuxarı küncdə məzmun və forma durur və tədris situasiyası sinif konteksti ilə məhdudlaşdırılır. Didaktik üçbucaq öyrətmən, öyrənci və tədris məzmunu arasındakı əlaqəni izah etmək və öyrənmək üçün Qərbdə tarixən ən əsas və ən yayılmış model hesab edilsədə, çeşidli ənənələr tədris və öyrənmə ölçülərinə diqqət ayırmaq xüsusunda, yəni ağırlıq mərkəzinin harada yerləşməsi qonusunda, fərqlənirlər.
Alman dilli quzey-kontinental kontekstdə didaktika, özünün müxtəlif formalarında, hər bir fərdi öyrəncinin optimal inkişaf etməsi və təhsil əldə etməsi üçün tədrisin necə təşkil olmasına dair sistematik özünüəks (ing. reflection) kimi təsvir edilə bilər. Bu nəticə etibarilə o deməkdir, eyni fənn məzmunu fərqli öyrəncilər tərəfindən fərqli yollarla başa düşülə bilər və fərqli mənalar ala bilər. Bu nöqteyi-nəzərdən belə nəticə çıxır ki, tədris və təlim heç də dərhal bir-birinə bağlı deyildirlər, onlar fərqli və ayrı yollarla gedə bilərlər. İngilisdilli anglo-sakson təhsil ənənəsində isə tədris və öyrənmə çox vaxt bir-birindən ciddi şəkildə ayrılır və müxtəlif addımlara/ mərhələlərə yönəldilir. Birinci addımda tədris planının matrisi hazırlanır. İkinci addımda, bu, okulda və/və ya sinifdə tətbiq ediləcək eyləm proqramı şəklində paketləşdirilir. Beləcə Nə -Necə- sualları tamamilə ayrı tutulur.
Tədrisin ”qara qutusunun” içində nə var? Almandilli quzey-kontinental ”Bildung” ənənəsi, fərdin öz aid olduğu kültürdə yetişməsini ön plana çıxarır, anqlo-sakson ənənə isə hədəfə çatmaqda effektiv instrumental üsula öncəlik verir. Müxtəlif ənənələr daxilindəki perspektivlər və görüşlər baxımından yaranmış bu böyük fərqlər tarixən ona gətirib çıxarmışdır ki, sinifdə faktiki olaraq baş verənlərin çoxu tədqiq edilməməşdir. Tədris kontekstində de fakto nələr baş verir, məsələn, Almaniyada və ya ABŞ-da, “qara qutu” olaraq qalmışdır. Bu səbəbdən Handbook of research on teaching adlanan tədris sahəsinin ilk beynəlxalq tədqiqat icmalında (Cage, 1963), Tədris üzrə tədqiqat kitabçası, yalnız okullarda və sinif otaqlarında faktiki tədris haqqında bölümlər daxil edilmişdir. İcmanın əsas hissəsi davranış elmi və psixoloji tədqiqatların modellərindən və onların tədrisin daha effektiv olması üçün necə istifadə olunacağından bəhs edir.
Yaxşı tədris nədir? Onu əslində nə səciyyələndirir? Tədrisin və öyrənmənin həm tədqiqat, həm də təcrübə sahəsini təşkil etməsi o deməkdir ki, fərdi və ən yaxşı tədris üsullarını həyata keçirmək üçün edilən bütün cəhdlər həmişə problemlərlə qarşılaşır, çünki bütün tədris situasiyaları müəyyən mənada həmişə unikaldır, özünəməxsusdur. Keyfiyyət baxımından yaxşı tədrisin əsas prinsipləri və ilkin şərtləri nələrdir və tədrisin keyfiyyətini necə qiymətləndirmək olar? Buna baxmayaraq, biz işimiz zamanı yenə də yaxşı tədrisin zaman-zaman təkrarlanan və zaman keçdikcə sabit qalan bəzi ümumi prinsipləri və keyfiyyətləri olduğunu müşahidə etmişik. Tədqiqat tərəfindən müəyyən edilmiş bu prinsiplər konkret tədris praktikası üçün verilən tövsiyələrdən daha yüksək abstraksiya səviyyəsindədir, lakin tədrisini inkişaf etdirməyə çalışan və bu səbəbdən də öyrəncilərinin öyrənmə prosesini yaxşılaşdırmaq istəyən hər kəs üçün bunları bilmək vacibdir. Tədris və öyrənmə sahəsindəki araşdırmalar genəldə onu göstərir ki, keyfiyyətcə yaxşı tədris təşkil olunmuş, planlaşdırılmış və refləktə etməyə önəm verən tədrisdir. Belə tədris həm güclü fənn biliyinə, həm də bu biliyin öyrəncilərə effektiv şəkildə yeridilməsinə əsaslanır. Keyfiyyətcə yaxşı tədrisin əsas şərtlərindən biri də öyrəncilərin inkişaf olunacaq ehtiyaclarını anlamaqdır. Müxtəlif, çətin və ruhlandırıcı yanaşmalara əsaslanan tədris və öyrəncinin müstəqil öyrənən subyekt olmasını təşviq edən tədris eyni zamanda öyrənməni asanlaşdırır və öyrəncilərin yaradıcılığını və təxəyyülünü stimullaşdırır. Keyfiyyətcə yaxşı tədris üçün bu cür ümumi prinsiplər müxtəlif yollarla ifadə oluna və təsvir edilə bilər. Lakin xülasə olaraq yenə də deyə bilərik ki, məzmun vahidləri və psixoloji aspektlərin birləşməsi, eyni zamanda öyrətmənin pedaqoji və didaktik məsələlərini eyni vaxtda həll etmək bacarığı, tədrisdə bir sıra müxtəlif alt kateqoriyalarda uğur amillərini təşkil edir. Məsələn, tədris planının gəlişdirilməsi, dərsin planlaşdırılması, tədrisin keçirilməsi, pedaqoji dəyərləndirmə və dəyərləndirmənin əsasında aparılan iş (feedback, məsələn söhbət və ya qısa izah və s.). Yuxarıda qeyd etdiyimiz müxtəlif aspektləri araşdıran tədqiqatçılar, tədrisin keyfiyyətinin aşağıkı əsas komponentlərdən də asılı olduğunu müəyyən ediblər:
- Tədrisin yaxşı olması üçün hansı məzmunun tədris olunacağına dair adekvat və yaxşı düşünülmüş seçim edilməlidir;
- Öyrənənlərin diqqəti koqnitiv şəkildə (idrakla) bu məzmuna yönəldilməlidir.
- Öyrətmən seçilmiş məzmun əsasında öyrəncilər üçün məsələləri/tapşırıqları ən yaxşı necə yarada biləcəyi barədə biliklərə sahib olmalıdır.
- Öyrətmənin həm də gərək təqdimat üsullarının, həmçinin tapşırıqların icrasında öyrəncilərə yol göstərməyin/ kömək etməyin yollarından ibarət geniş repertuarı ola.
- Nəhayət, öyrətməndən öyrəncilərin adətən hər hansı bir məzmunun öyrənmə prosesində etdikləri tipik səhvlər haqqında, tapşırıqların həllində genəldə baş verən öyrənci davranışları və hərəkət nümunələri haqqında biliyi olması tələb olunur.
Ənənəvi və konstruktivist tədris modelləri. Beynəlxalq (ingilis dilli) tədqiqatlarda ənənəvi və konstruktivist tədris modelləri arasında fərq qoyulur. Ənənəvi tədris modeli öyrəncilərin sırf fənn biliklərinin öyrənməsini/mənimsəməsini vurğulayır, konstruktivist model isə öyrəncilərin müxtəlif təlim/öyrənmə prosesləri vasitəsilə inkişafını vurğulayır. Ənənəvi tədris Şirens tərəfindən (Scheerens et al, 2007) öyrənci perspektivindən baxdıqda reaktiv və reseptiv tədris kimi təsvir edilmişdir, yəni burada öyrəncilərə əsasən tədrisin qəbulediciləri kimi baxılır, onların bilik mənimsəməkdə/qazanmaqda az-çox passiv iştirak etməsi gözlənilir. Öyrətmən perspektivindən baxdıqda ənənəvi tədrisdə möhkəm struktura olur, və belə tədris təməl fənn biliklərinə yönəldilmiş olur. Konstruktivist tədris öz açıqlığı ilə xarakterizə olunur (məsələn, dəyişiklik etməyə), belə tədrisdə öyrəncilərin aktivliyinə, kəşf /axtarış etməsinə və sınaq aparmaq həvəsinə daha çox yer verilir. Konstruktivist tədrisdə öyrəncilərin qrup işlərinə tez-tez yer verilir, yəni öyrəncilər kiçik qruplara bölünərək gündəlik yaşam problemlərinə yönəlmiş və higher-order-thinking adlanan proseslərə (yüksək səviyyəli düşüncə tipi problemlərə) yönəlmiş tapşırıqları birlikdə işləyirlər. Məsələn nisbətən böyük məsələ həlli, təhlil və tədqiqat tələb edən prosesslər. Bu cür proseslərdə tədris vasitəsi ilə öyrəncilərdə həm fənn bilikləri, həm də gündəlik həyatda lazım olan biliklər və sosial qabiliyyətlər inkişaf edir. Lakin bu heç də o demək deyil ki, ya ənənəvi ya konstruktivist tədris modelini, ikisindən birini seçməliyik. Bu modellər qarşı-qarşıya qoyulmamalı, əksinə onlar bir-birini tamamlasa daha yaxşı olar.
Ümumi istinad çərçivələri. Beynəlxalq araşdırmalarda həm nəzəri, həm də praktiki baxımdan yaxşı tədrisin başa düşülməsi üçün önəmli olan bir sıra əsas prinsiplər və ya ilkin şərtlər irəli sürülür. Bir çox tədqiqatçılar, hüquq-normativ (qayda-qanun) sənədlərindən və tədris planlarından asılı olmayaraq, bütün fənlərə və öyrənci yaş qruplarına aid olan keyfiyyətcə yaxşı tədris üçün ortaq bir istinad dilinə/terminolojiyə ehtiyac olduğunu vurğulayırlar. Çağdaş tədqiqatların qənaətinə görə, keyfiyyətcə yaxşı tədrisin inkişafı o deməkdir ki, məsələn diqqət öyrətmənin tədris məzmununu necə çatdırmağındansa, okulda və sinif otaqlarında baş verən ünsiyyətin (ing. interaction) keyfiyyətlərinə və xarakterinə yönəlir. Öyrətmən- öyrəncilər arasındakı interaksiya və öyrəncilər arasındakı interaksiya, öyrəncilərin diqqətini qazanmaq və saxlamaq, onları həvəsləndirmək, onların abstrakt düşüncəsinin inkişafına təkan vermək üçün müxtəlif yollarla istifadə edilə bilən güclü bir vasitədir. Yəni, artıq tədrisin keyfiyyəti müzakirə edildiyində ön plana çıxarılan dərs materialın miqdarı və ya hətta tədrisdə bir məzmunun çatdırılma üsulu deyildir. Artıq əsas diqqət mərkəzində ondansa öyrətmənlər -öyrəncilər arasında, və öyrəncilər arasında qurulan qarşılıqlı sosial münasibətlər, həmçinin öyrəncilərin hansı üsülla tədricən inkişaf etməsi və öyrənməsi durur (Alexander, 2010). Xasiyyət etibarilə dialoq üzərində qurulan bir tədrisi nəzərdə tutan, yəni söhbətin bütün potensialından istifadə edilən tədrisi nəzərdə tutan Robin Alexander (2010) keyfiyyətli tədrisin nədən ibarət olduğunu beş ölçü şəklində ifadə edir:
- Öyrətmənlər və öyrəncilər dərs tapşırıqlarını bir qrupda və ya sinifdə birlikdə həll edirlər – kollektiv ölçü (a collective dimension).
- Öyrətmənlər və öyrəncilər bir-birlərini dinləyirlər, interaksiyada olurlar, fikirlərini bölüşülər və müxtəlif baxış açılarını götür-qoy edirlər – qarşılıqlıq ölçüsü (a mutual dimesion).
- Öyrəncilər səhv cavab verməkdən və ya başa düşmədiklərini söyləməkdən çəkinmədən fikirlərini sərbəst şəkildə ifadə edirlər, bir-birlərinə ümumi anlayış əldə etmək üçün kömək edirlər – dəstək/təkan ölçüsü (a supportive dimension).
- Öyrətmənlər müəyyən pedaqoji məqsədlərlə/hədəflərlə sinifdə baş verən ünsiyyəti planlaşdırır və idarə edirlər – məqsədyönlü ölçü (a goal-oriented dimension).
- Öyrətmənlər və öyrəncilər interaksiyanı öz fikirləri və bir-birlərinin fikirləri üzərində qururlar və bu fikirləri tutarlı (bir-birinə aidiyyatı olan) düşüncə və öyrənmə yolları ilə əlaqələndirirlər – kumulativ ölçü, yığılma ölçüsü (a cumulative dimension).
Digər tədqiqatlar, öyrəncilərin öyrənə biləcəyi vəziyyətlərin yaradılması üçün zəruri şərtləri meydana gətirən amilləri izah edirlər. Bu amillər aşağıdakılardır:
- Öyrəncilər vəziyyətin gərəkdirdiyi əməllər tələblərini dərk etməlidirlər, onlardan xəbərdar olmalıdırlar.
- Öyrəncilər bir mətni oxumaq və ya bir tapşırığı yerinə yetirmək kimi məsələləri həll etməkdə bir qədər çətinlik çəkdiklərini hiss etməlidirlər (onlara maqarlı olması üçün).
- Öyrəncilərdə həm də ”bir şey etmək” üçün kifayət qədər motivasiya və istək olmalıdır, onlar öncədən bildiklərinin qabilində qarşılarına qoyulan tələbləri və gözləntiləri şərh edə bilməlidirlər.
- Öyrəncilər öz öyrənmə vərdişləri və qabiliyyətlərindən xəbərdar olmalıdırlar.
Tədqiqatlar bu şərtlər yerinə yetirildikdən sonra və tədrisdə öyrənmə vəziyyəti əlverişli olduqda, öyrəncilərin müxtəlif koqnitiv düşüncə əməliyyatları ilə məşğul olmasının vacibliyini göstərirlər, sadə əzbərləmədən tutmuş yüksək səviyyəli adlanan proseslərə gədər. Öyrəncilər eyni zamanda metakoqnitiv strategiyalar tətbiq etməyi öyrənməlidirlər, yəni koqnitiv düşüncə əməliyyatlarını müəyyən dərəcədə şüurlu istifadə etməli, öz nəzarəti ilə idarə etməyi öyrənməlidirlər. Belə metakoqnitiv strategiyalara nümunə, məsələn:
- Hədəf və bilik tələblərindən xəbərdar olmaq;
- Hədəfləri ifadə etməyi başarmaq;
- Əhatəli dərs tapşırıqlarını kiçik alt tapşırıqlara bölmək;
- Problem həlletmə strategiyalarından istifadə etmək, öz həllini qiymətləndirməyi bacarmaq və s.
Bu şəkildə reallaşan tədris prosesinin sonunda öyrəncilərin öz öyrəndiklərini təqdim etmə qabiliyyətini əhəmiyyətli dərəcədə inkişaf etməsini görmək olur. Bu da o deməkdir ki, öyrətmək üçün hər zaman daha çox şey vardır və son məhsul nisbidir, lakin belə bir son məhsul yenə də öyrəncilərin özləri üçün və ya başqalarına söylədikdə, xüsusən də öyrətmənə, avtomatik dəyərləndirmə funksiyasını daşıyır. Bu cür avtomatik fikir bildirmə həm də özünü tənzimləyən öyrənmənin (ing. self-regulating) vacib aspektidir (Scheerens et al, 2007).
Yeni biliyi özündə cəmləşdirmək. Bəzi tədqiqatçılar öyrənmə ilə bağlı təməl fərziyyələrdəki dəyişikliklər və onlardan irəli gələn müxtəlif ümumi araşdırma yanaşmaları baxımından (yuxarıda qeyd etdiklərimizi nəzərə alaraq), keyfiyyətcə yaxşı tədris və öyrənmə üçün zəruri şərtlər barədə müəyyən prinsipial nəticələr çıxarmışlar. Məsələn, günümüzdə son 15-20 il ərzində yeni biliklər əldə etmiş müəyyən tədqiqatların işığında tədris üçün zəruri olan bəzi genəl şərtlərin tərifinin yenidən verilməsinin zərurəti müzakirə olunur. Bu, məsələn beyin tədqiqatlarının nəticələri və nevroloji aspektlərlə bağlı qənaətlərdir. Bu həm də ilk növbədə inkişafın psixoloji mərhələlərini deyil, əksinə sosial və şifahi interaksiyanı koqnitiv (bilişsel) inkişaf üçün əsas olduğunu göstərən tədqiqat nəticələridir. Bunu bir növ Vıgotskinin nəzəriyyəsinin tədricən inkar edilməsi, Piajenin (Jean Piaget) mərhələ nəzəriyyəsinin tədris və öyrənmə baxımından prinsipial başlanğıc nöqtəsi olması kimi yormaq olar. Son tədqiqatlar həmçinin dil çatışmazlığı modelləri, kompensasiya xarakterli tədris və müəyyən edilmiş öyrənmə üslubları əsasında aparılan tədrisi elə də onaylamırlar. Əksinə, tədrisdə vurğunu çətinliklərə, variasiyaya və multisensor yanaşmaların birləşməsinə, həmçinin öyrəncilərə müxtəlif təcrübələr vermək üçün əməl və dil vasitəsilə simvolik göstərmələrlə işlərə yönəldilməlidir.
Əvvəldə qeyd edildiyi kimi, həm öyrətmən-öyrəncilər arasında, həm də öyrəncilərin arasında sinifdə gedən kommunikasiyanın keyfiyyəti həlledici rol oynayır, bu da öz növbəsində metakoqnisiyanın və özrefleksiyanın öyrənilə bilən bacarıqlar olduğu qənaətinə gətirib çıxarır – bunlar anadan gəlmə və ya yalnız öyrəncilərin hansı inkişaf mərhələsində olmasından asılı deyillər.
Onu da qeyd edək ki, öyrəncinin aldığı qiymətə deyil, etdiyi cəhdlərə dəyər vermək/tərifləmək lazımdır, bu onun motivasiyasına çox təsir etdiyi üçün böyük əhəmiyyət kəsb edir (Alexander 2010).
Əlverişli pedaqoji mühit. İsveçdə pedaqoji mühitə çox önəm verilir. Pedaqoji mühit termini ümumi bir termin kimi istifadə olunur, burada İsveç kontekstində tədrisə dair ümumi tədqiqat nəticələri daxilində olan amillər həm öyrəncilərin motivasiyası, həm də öyrətmənlərin nəticəsi baxımından vacib görünür. Bu kontekstdə ortaya çıxan keyfiyyətli tədrisin ümumi prinsipləri, məsələn: öyrətmənlərin can yandırması, gerçəkdən ilgilənməsi, peşə rolundakı sadiqliyi, özünə inamı və güvəndə olması, həmçinin onların kolleqaları və öyrənciləri ilə əlaqə yaratmaq bacarığıdır. Pedaqoji mühit anlayışına həm də öyrətmənlərin öz öyrəncilərindən yüksək nəticələr gözləntiləri olması, onların öyrəncilərlə qarşılıqlı etibarla qurulan münasibətləri aiddir. Sosial münasibətlər, müsbət okul mühiti və öyrətmən rəhbərliyi kimi məsələlərlə əlaqədar pedaqoji mühitlə işləyən okullarda yaxşı nəticələr əldə edilməsinə dair kifayət qədər tədqiqat raportları var (Hokansson & Sundberq, 2009).
İsveçdə mövcud olan keyfiyyətli tədrisə başqa bir yanaşma, keyfiyyətcə yaxşı tədrisin ümumi prinsiplərinin daha çox məzmun və fənnlə əlaqəli olduğu variasiya nəzəriyyəsi tədqiqatlarından irəli gəlir. Variasiya nəzəriyyəsi tədqiqatlarında bütün sinif, qrup işi və ya fərdi iş kimi tədris formaları ilə bağlı məsələlər qoyulmur. Əvəzində, tədqiqatların maraq dairəsini öyrəncilərin müəyyən bir mövzu məzmununu/fənn məzmununu anlamaqla öyrətmənin həmin fənn məzmununu müxtəlif üsüllarla dərs demək tərzi arasındakı əlaqə təşkil edir (Sahlström, 2008).
Fərdə yönəli istiqamət. Bu çərçivədə, İsveç tədris araşdırmaları İsveç məktəblərində tədrisdə bütün sinifə dərs demək üsülundan öyrəncinin öz işinə keçməklə böyük dəyişiklərin getdiyini göstərir. Bu dəyişikliyin səbəbləri cəmiyyətdə baş verən dəyişikliklərin fonunda ön planda duran fərdə yönəliklə müzakirə olunur. Öyrəncilərin öyrənməsi, inkişafı və tədrisin gedişatına təsir göstərməsi üçün müxtəlif iş metodlarının və tədris nümunələrinin nəticələri barədə danışarkən tədqiqat mənzərəsi çox mürəkkəb görünür. Həm mənfi həm də müsbət nəticələrinə dair əlamətlər mövcuddur. Öyrəncilər kifayət qədər müəllim dəstəyi olmadan tapşırıqları özləri həll etmək üçün qaldıqda bəzi müstəqil iş formalarının mənfi nəticələrinə dair əlamətlər mövcuddur. Eyni zamanda müstəqil iş üzrə çalışan öyrəncilərə daha geniş fərdi təsir etmək imkanı, onların daha çox məsuliyyət almaq kimi faydalar barədə də müzakirələr var. Fərdi öyrənci işlərinin üç fərqli forması arasında aşağıdakı fərqlər göstərilir (Qranström, 2007):
- Fərdi/təkbaşına iş, müəllim öyrənciyə öz başına işi yerinə yetirmək üçün tapşırıqlar verir və bunun üçün müəyyən vaxt təyin edir.
- Şəxsi iş/Öz işi, müəllim öyrənciyə müəyyən bir müddət ərzində başa çatması üçün tapşırıqlar verir, ancaq öyrənci vaxtın necə paylanacağına və işi necə planlaşdıracağına özü qərar verir.
- Vəziyyətə görə iş, müəllim tapşırıqları və onların nə vaxt hazır olmasına qərar verir, ancaq tapşırığın nə vaxt və harada yerinə yetiriləcəyini (okulda və ya evdə) öyrəncinin özü qərar verir.
Norveç kontekstindən, öyrətmənlərin öyrəncilərlə birlikdə işlədikləri və birlikdə araşdırdıqları iş formalarının – kooperativ öyrənmənin – müsbət təcrübələri bildirilir. Öyrətmənlərin və tədqiqatçıların birlikdə sinif otaqlarında əməkdaşlıq modellərinin təqdim etdikləri Norveç tədqiqatları bütün öyrəncilər üçün yaxşı təlim effektləri olduğunu göstərmişdir, bu üsül özəlliklə də zəif nəticə göstərən öyrəncilər üçün əlverişli olmuşdur.
Keyfiyyətli yaxşı tədris – indi harada dayanırıq? Yaxşı, bəs keyfiyyətli tədrisi nələrin səciyyələndirdiyi haqqında bu gün nə bilirik? Bir tədrisin yaxşı olub olmamasını haradan/necə bilirik? Bu əsərdə yuxarıda bildirdiyimiz həm beynəlxalq, həm də İsveç üçün milli nəticələr, keyfiyyətli tədrisin genəl prinsiplərinin ümumi tədris keyfiyyətlərini təşkil edən başlanğıc nöqtəsi kimi davamlı olduğunu göstərilir. Qeyd edildiyi kimi, əsas fərziyyələrə və tədqiqat metodlarına, həmçinin tədris prosesinin hansı hissələrinə diqqət yetirilməsinə dair tədqiqatlarda bəzi fərqli yollar mövcuddur, lakin bir çox cəhətdən əsas nəticələr üst-üstə düşür. Ancaq hər zaman böyük əhəmiyyət kəsb edən məqam tədrisin aparıldığı kontekstin nəzərə alınmasına göstərilən həssaslıqdır – ölkələrin, məktəblərin, sinif otaqlarının və ya fərdlərin yaşı, imkanları (nevroloji, bioloji, sosial) və əvvəlki biliklərinə görə fərqli şərtlərdən asılı olmayaraq.
Tədrislə bağlı aparılan son tədqiqatlar əvvəllər metod və məzmun arasında görülən kəskin sinir çizgilərini arxada qoymuşdur. Bir tərəfli ünsiyyət növü kimi görülən tədris anlayışı tədrisin məzmununun tədris formasından ayrıla bilmədiyi vasitəylə, vasitəçiliklə öyrənmə (mediated learning) kimi düşüncə ilə əvəz edilmişdir. Öyrəncilərin tədris hədəflərinə nail olmaq üçün öyrətməndən hədəfləri gerçəkdən anlamaq, o cümlədən hədəflərin dəyişən cəmiyyətlə əlaqəsini anlamaq, eyni zamanda bilik və məzmunun seçimi, təşkili və qiymətləndirilməsi üçün nəyin/nələrin uyğun olduğunu anlamaq tələb olunur. Bundan əlavə, öyrətməndə kontekstual şəraitlə, şərtlərlə bağlı kültürəl həssaslığın olması gərəkir.
Tədqiqat nəticələri, yaxşı münasibətlərin və yaxşı sinif iqliminin inkişafına təkan verən ruhda keçən tədrisin vacibliyini, eyni zamanda öyrətmənin bilik və öyrənmənin bütün öyrəncilər üçün mümkün olduğuna inanmasının, həm fərdlər həm də bütövlükdə cəmiyyət üçün çox vacib olduğunu göstərir. Bu cür məqsəd və prinsiplərə uyğun olaraq təşkil olunan tədris fərdlərin və qrupların intellektual, şəxsi və sosial imkanlarının cəmiyyətdə geniş mənada iştirak etməsinə kömək edir.
Öyrətmən fəaliyyəti. Bir şeyi yaxşı bilirik – öyrətmənlər və onların tədrisi öyrəncilərin öyrənməsi və bununla da onlaırn eyni zamanda akademik uğurları üçün böyük əhəmiyyət kəsb edir. Tədqiqatlar göstərir ki, çox effektiv olan öyrətmənlərdən dərs alan öyrəncilər, az effektiv olan öyrətmənlərdən dərs alan öyrəncilərlə müqaisə dörd qat çox mənfəət əldə edirlər. Başqa sözlə desək, öyrəncilər arasında ortaya çıxan nəticə fərqlərinin 15- 30 %-i öyrətmənlərin bilikləri, bacarıqları və nə etdikləri ilə əlaqəli keyfiyyət fərqlərindən ibarətdir.
Öyrətmənlərin bilməsi gərəkən şeylər. Tədqiqatın uzun müddətdir maraqlandığı məsələ öyrətmənlərin işlərini yüksək keyfiyyətlə həyata keçirə bilmələri üçün ən vacib hansı biliklərin olmasıdır. Öyrətmənlərin mütləq gərəkli biliklərin çox aydın və sadələşdirilmiş bölüşdürülməsi həm fənn biliklərinin həm də pedaqoji biliklərindən ibarət olmasıdır. Yəni öyrətmənlər həm tədrisin məzmunu, həm də bu məzmunun hansı struktura ilə qurulması, öyrənciyə çatdırılması və öyrənilməsi barədə biliklərə sahib olmalıdırlar.
Li Şulman – Lee Schulman (1986, 1990) – öyrətmənlərin biliklərinin konseptual fərqliliyini ifadə edən ilk alimlərdən idi. Onun izahında əvvəlcə, öyrətmən üçün zəruri sayılan üç müxtəlif biliyin təsvirindən söhbət gedirdi: məzmun biliyi, pedaqoji bilik və tədris planı bilikləri. Şulman öz təsnifat sistemindəki bu üç başlanğıc nöqtəsini həmdə ümumi pedaqoji biliyə və pedaqoji fənn biliyinə ayırmışdı, burada sonuncunu biz indi fənn didaktikası adlandırırq.
Mənbələr:
Alexander, Robin J. (red.) (2010). Children, their world, their education: the final report and recommendations of the Cambridge Primary Review. New York: Routledge.
Comenius, Johann Amos (1657). Didactica Magna.
Cizek, Gregory J. (2010). An introduction to formative assessment: history, characterictics and challenges. In: Heidi L. Andrade & Gregory J. Cizek (red.) (2010), Handbook of formative assessment. New York: Routledge.
Gage, Nathanael (1963). Paradigmsfor research on teaching. In: Nathanael Gage (red.) (1963), Handbook of research on teaching: a project of the American Educational Research Association, a department of the National Education Association. Chicago: Rand McNally.
Gage, Nathanael L. (1978). The scientific basis of the art of teaching. New York: Teachers College Press.
Granström, Kjell (red.) (2007). Forskning om lärares arbete i klassrummet. Stockholm: Myndigheten för skolutveckling.
Guskey, Thomas R. (2010). Formative assessment: the contributions of Benjamin S. Bloom. In: Heidi. Andrade & Gregory J. Cizek (red.) (2010), Handbook of formative assessment. New York: Routledge.
Hattie, John A.C. (2009). Visible learning: a synthesis of over 800 metanalyses relating to achievement. London: Routledge.
Håkansson, Jan & Sundberg, Daniel (2009). Skolans inre arbete och resultat. I: Skolverket (2009), Vad påverkar resultaten i svensk grundskola?: kunskapöversikt om betydelsen av olika faktorer. Stockholm: Skolverket.
Håkansson, Jan & Sundberg, Daniel (2012). Utmärkt undervisning. Framgångsfaktorer i svensk och internationell belysning. Natur & Kultur, Stockholm.
Hamilton, David (2011). On the origins of the educational terms class and curriculum. In: Bernadette Baker (red.) (2011), New curriculum history. Rotterdam: Sense Publishers.
Jaspers, Karl (1951/2003). Way to wisdom: an introduction to philosophy. New Haven: Yale University Press.
Lundgren, Ulf. P. (1992). Didaktikens namn. In: Staffan Selander (red.) Forskning om utbildning: en antologi. Stockholm: Brutus Östlings bokförlag Symposium.
Sahlström, Fritjof (2008). Från lärare till elever, från undervisning till lärande: utvecklingslinjer i svensk, nordisk och internationell klassrumsforskning. Stockholm: Vetenskapsrådet.
Scheerens, Jaap, Luyten, Hans, Steen, Rien & Luyten-de Thouars, Yvonne (2007). Review and meta-analyses of school and teaching effectiveness. Enscede: Department of educational Organisation and Management, University of Twente.
Shulman, Lee (1987). Those who understand: knowledge growth in teaching. Educational Researcher, 15 (2).
Shulman, Lee (1990). Research in teaching and learning: a project of the American Educational Research Association. VOL. I, Paradigms and programs. New York: Macmillan.
Sundberg, Daniel (2009). Policyrelevanta kunskapsöversikter inom utbildningsområdet: en analys och kartläggning. Stockholm: Utbildningsdepartementet.